Fy enw i yw Maryam, ac ar hyn o bryd dw i yn fy ail flwyddyn yn astudio ar gyfer doethuriaeth ym maes dwyieithrwydd ym Mhrifysgol Bangor. Mae fy ymchwil yn canolbwyntio ar sgiliau darllen plant ag Anhwylder Iaith Datblygiadol (DLD) sy’n ddwyieithog Arabeg-Saesneg. Rwy’n dod yn wreiddiol o’r Iorddonen ac yn siarad Saesneg ac Arabeg yn rhugl. Dysgais i Almaeneg yn rhan o fy ngradd baglor, ac ar hyn o bryd dw i wrthi’n dysgu Cymraeg a Sbaeneg.
Pam wnest ti gofrestru ar gyfer y prosiect yn y lle cyntaf, a pham ddest ti yn ôl am yr ail flwyddyn?
Pan welais i bostiad ynglŷn â chofrestru ar gyfer y prosiect ITM y llynedd, roeddwn i’n hynod gyffrous! Y cyfle i weithio gyda phlant ysgol, agor eu llygaid i hwyl ieithoedd a chael fy nhalu – roedd hi’n gyfle rhy dda i’w golli! Roedd ymweld â’r ysgolion ac ysbrydoli’r dysgwyr gydag adnoddau creadigol y tîm ITM yn gwneud y prosiect yn gymaint hwyl, roedd yn rhaid i mi ddychwelyd am ail flwyddyn. Mae hi hefyd yn grêt gweithio gyda’r tîm ITM – maen nhw’n llawn hwyl, yn ysbrydoledig ac yn gefnogol iawn. Yn ogystal â dychwelyd am ail flwyddyn gyda’r Prosiect Mentora ITM, dw i hefyd wedi ymuno â’u Prosiect Caru Darllen oherwydd fy mod wrth fy modd yn darllen ac mae’n gysylltiedig â’m doethuriaeth.
Pa sgiliau wyt ti wedi eu hennill neu eu datblygu yn ystod dy gyfnod yn fentor
Dw i wedi magu sawl sgil, gan gynnwys gorfod addasu fy arddull cyflwyno i gyd-fynd ag anghenion y myfyrwyr a dysgu sut i fod yn fwy hyderus wrth gyflwyno o flaen grŵp o fyfyrwyr. Mae’r adnoddau mor greadigol ac maen nhw wedi fy helpu i fod yn fwy creadigol fy hun. Mae’r profiad yn bendant wedi fy ysbrydoli i barhau ar fy nhaith dysgu iaith.
Beth oedd yr uchafbwyntiau i ti yn ystod dy gyfnod fel mentor?
Yr uchafbwynt mwyaf i fi fel mentor oedd yn ystod ail dymor y prosiect; roeddwn i’n cynnal fy sesiwn olaf gyda’r dysgwyr, ac roedden nhw i gyd yn dweud cymaint roeddwn nhw eisiau i’r sesiynau fod yn barhaol. Roedden nhw wrth eu bodd â phob munud o’r sesiynau ac ddim eisiau iddyn nhw ddod i ben – dywedodd un dysgwr: “Hoffwn i pe bai’r sesiynau yma’n para trwy gydol y flwyddyn”.
Oes gen ti unrhyw gyngor neu awgrymiadau ar
gyfer mentoriaid presennol neu fentoriaid y dyfodol?
Un darn o gyngor gen i fyddai i beidio â phoeni, mae’r athrawon yn wych ac yn helpu os ydych chi’n cael trafferth gyda grŵp o ddysgwyr. Gallwch ddibynnu ar dîm y prosiect hefyd, oherwydd maen nhw yna i’ch helpu chi – gofynnwch iddyn nhw bob amser os ydych chi’n ansicr am rywbeth, maen nhw’n ateb yn syth!